ပြည်ပသို့ ဒေါ်လာ တစ်သောင်းထက် ငွေပိုလွှဲလျှင် ဗဟိုဘဏ်မှ ခွင့်ပြုချက် ယူရမည်ဟုဆို

နေပြည်တော်၊ ဖေဖော်ဝါရီ ၄ ရက်(ဆင်ဟွာ)

ပြည်ပသို့ ကုန်သွယ်မှု အတွက် မဟုတ်သော ငွေလွှဲပေးပို့ခြင်းများအတွက် တစ်ကြိမ်လျှင် အများဆုံး အမေရိကန်ဒေါ်လာ တစ်သောင်းအထိ သတ်မှတ်ထားရှိရာ ၎င်းထက်ပိုများသော ငွေပမာဏကို လွှဲပြောင်း ပေးချေလိုပါက ဗဟိုဘဏ်၏ ခွင့်ပြုချက်ကို ရယူရမည်ဟု မြန်မာနိုင်ငံတော် ဗဟိုဘဏ် ဒုတိယ ဥက္ကဌ ဦးဘိုဘိုငယ်က ယနေ့ ပြည်သ့ူ့ လွှတ်တော် အစည်းအဝေးတွင် ဖြေကြားခဲ့သည်။

“ပြည်ပ ခရီးစဉ်များ၊ ဆေးကုသမှု၊ ပညာသင်စရိတ်နှင့် စာမေးပွဲကြေးများ၊ ညီလာခံနှင့် ဆွေးနွေးပွဲ တက်ရောက်ခြင်း၊ ပြည်ပတွင် နေနထိုင်သည့် မိသားစုဝင်များ၏ နေထိုင်စားသောက်မှု ကုန်ကျစရိတ် တို့အတွက် အများဆုံး အမေရိကန် ဒေါ်လာ တစ်သောင်းအထိ ပမာဏကို သတ်မှတ်ထားသည့် အထောက်အထားများ တင်ပြလာပါက စိစစ်ပြီး လွှဲပို့နိုင်ပါတယ်၊ အမေရိကန် ဒေါ်လာ တစ်သောင်း၊ သို့မဟုတ် ယင်းနှင့်ညီမျှသော နိုင်ငံခြားငွေထက် ပိုများသော ပမာဏကို လွှဲပြောင်းပေးချေလိုပါက ဗဟိုဘဏ်သို့ တင်ပြပြီး ခွင့်ပြုချက်ရယူရမှာ ဖြစ်ပါတယ်” ဟု ရှမ်းပြည်နယ် ပလောင်အုပ်ချုပ်ခွင့်ရ ဒေသ မန်တုံမဲဆန္ဒနယ် ပြည်သူ့ လွှတ်တော် ကိုယ်စားလှယ် ဒေါ်နန်းမိုး၏ အမေးကို ဖြေကြားရာတွင် ၎င်းက ပြောခဲ့ခြင်းဖြစ်သည်။

နိုင်ငံခြားသုံးငွေ စီမံခန့်ခွဲမှု ဥပဒေ၏ စည်းမျဉ်း အပိုဒ် (၂၉)အရ ထိုကဲ့သို့ ဆောင်ရွက်ရမည် ဖြစ် ကြောင်း လည်း ဗဟိုဘဏ် ဒုတိယ ဥက္ကဌက ပြောခဲ့သည်။ ထိုဥပဒေအရ ကုန်သွယ်မှုအတွက် ငွေလွှဲ ပေးပို့ခြင်းများကိုမူ ငွေကြေးပမာဏ ကန့်သတ်ထားခြင်း မရှိကြောင်း၊ နိုင်ငံခြား သုံးငွေ စီမံခန့်ခွဲမှု အပိုဒ် (၂၇) အရ နိုင်ငံခြား သုံးငွေများ ရောင်းဝယ်ဖောက်ကားသည့် လုပ်ငန်း လိုင်စင်ရ ဘဏ် ၃၅ ခုရှိကြောင်း၊ ၎င်းတို့မှာ မြန်မာနိုင်ငံတော် ဗဟိုဘဏ်က ဘဏ်လုပ်ငန်း လုပ်ကိုင်ခွင့် လိုင်စင် ထုတ်ပေးထားသော နိုင်ငံပိုင် ဘဏ် သုံးခု၊ ပြည်တွင်း ပုဂ္ဂလိက ဘဏ် ၁၉ ခု၊ နိုင်ငံခြားဘဏ် ဘဏ်ခွဲ ၁၃ ဘဏ်တို့ ဖြစ်ကြကြောင်း၊ နိုင်ငံခြားသို့ ငွေလွှဲလိုပါက အဆိုပါ ဘဏ်များနှင့် ဆက်သွယ် ဆောင်ရွက်ရမည်ဖြစ်ကြောင်းလည်း ၎င်းက ရှင်းလင်း ဖြေကြားခဲ့သည်။

ထို့အပြင် တရားမဝင် ငွေလွှဲပေးပို့ ခြင်းများအား ထိန်းကျောင်းရန် စင်ကာပူနှင့် ထိုင်းနိုင်ငံတို့၏ အတွေ့အကြုံများအား ရယူလျက် စည်းမျဉ်းတစ်ရပ် မူကြမ်း ပြုစု ရေးဆွဲထားပြီး ဖြစ်ကြောင်း၊ ထိုမူကြမ်းအပေါ် သက်ဆိုင်ရာ အဖွဲ့အစည်းအသီးသီးနှင့် ကော်မတီ အဆင့်ဆင့်တို့မှ တစ်ဆင့် ပြည်ထောင်စု အစိုးရအဖွဲ့၏ အတည်ပြုချက်ကို ရယူကာ ၂၀၁၉ ခုနှစ်အတွင်း ပြီးစီးရေး ဆောင်ရွက် သွားမည် ဖြစ်ကြောင်း၊ စည်းမျဉ်းများ ထုတ်ပြန်ပြီးပါက နိုင်ငံခြားငွေ လွှဲပြောင်း လက်ခံခြင်း လုပ်ငန်း လိုင်စင် ထုတ်ပေးခြင်း၊ အဆိုပါ လိုင်စင်ရရှိသည့် ကုမ္ပဏီများမှတာဝန်ရှိသူများကို ပြည်ထဲရေး ဝန်ကြီးဌာန FIU (Financial Intelligence Unit) က ပို့ချသည့် ငွေကြေး ခဝါချမှုနှင့် အကြမ်းဖက် ငွေကြေးထောက်ပံ့မှု ကာကွယ်ရေး ဆိုင်ရာ သင်တန်းများသို့ တက်ရောက်စေခြင်းတို့ကို ဆောင်ရွက်သွားမည် ဖြစ်ကြောင်းလည်း ဗဟိုဘဏ် ဒုတိယ ဥက္ကဌက ပြောခဲ့သည်။(Xinhua)