၇၄ ကြိမ်မြောက်ကုလသမဂ္ဂ အထွေထွေညီလာခံ စတင်

ကုလသမဂ္ဂ၊ စက်တင်ဘာ ၁၈ ရက်(ဆင်ဟွာ)

၇၄ ကြိမ်မြောက်ကုလသမဂ္ဂ အထွေထွေညီလာခံ ကို အမေရိကန်ပြည်ထောင်စု နယူးယောက်ရှိ ကုလသမဂ္ဂ အထွေထွေအတွင်းရေးမှူးချုပ်ရုံးတွင် စက်တင်ဘာ ၁၇ ရက်က စတင်ကျင်းပခဲ့ကြောင်းသိရသည်။

ညီလာခံတွင် ၇၄ ကြိမ်မြောက်ကုလသမဂ္ဂ အထွေထွေညီလာခံ ဥက္ကဋ္ဌ Tijjani Muhammad-Bande က ၂ဝ၁၉- ၂ဝ၂ဝ ခုနှစ်ဆိုင်ရာ ကုလသမဂ္ဂ ၏ အဓိက အရေးပါသည့် လုပ်ငန်းဆိုင်ရာအစီအစဉ်များကို ထုတ်ဖော်ပြောကြားခဲ့သည်။ ၎င်းက ယခုနှစ်ညီလာခံတွင် ယေဘုယျအကြောင်းအရာများဖြစ်သည့် ဆင်းရဲနွမ်းပါးမှုပပျောက်ရန်၊ အရည်အသွေးမီသည့် ပညာရေးရရှိရန်၊ရာသီဥတုပြောင်းလဲမှုကို အတူပူးပေါင်းကိုင်တွယ်ဖြေရှင်းရန်၊ ဘက်ပေါင်းစုံမှ ထိထိရောက်ရောက်ကြိုးပမ်းဆောင်ရွက်နိုင်မည့်အရေး ကိုအဓိကထားဆွေးနွေးသွားကြမည်ဖြစ်ကြောင်းသိရသည်။ ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတားရက်စ် ကလည်း ကုလသမဂ္ဂသည် လူသားအားလုံးနှင့်သက်ဆိုင်ပြီး ဘက်စုံ ပူးပေါင်းဆောင်ရွက်ရေးမူဝါဒ က ကမ္ဘာလုံးဆိုင်ရာ စိန်ခေါ်မှုများကို ဖြေရှင်းနိုင်မည့် အဓိကကျသည့် မူဝါဒဖြစ်ကြောင်း ပြည်သူလူထုအားလုံးယုံကြည်လက်ခံနိုင်စေရန်လိုအပ်ကြောင်း တွန်းအားပေးပြောကြားခဲ့သည်။ (Xinhua)