အာဆီယံနိုင်ငံများမှ ထိပ်တန်းခေါင်းဆောင်များ လာအိုနိုင်ငံ၌ တွေ့ဆုံကြမည်

ဗီယန်ရှင်း ၊ စက်တင်ဘာလ ၅ ရက် (ဆင်ဟွာ)

အရှေ့တောင်အာရှနိုင်ငံများမှ အဆင့်မြင့် အစိုးရအရာကြီးများ ၊ ကမ္ဘာ့ခေါင်းဆောင်များ နှင့်ဒေသတွင်းခေါင်းဆောင်များသည် လာအိုနိုင်ငံ ဗီယန်ရှင်းမြို့၌ စက်တင်ဘာလ ၆ ရက် မှ ၇ ရက်အထိ ကျင်းပရန်ရှိသည့် ၂၈ ကြိမ်မြောက် နှင့် ၂၉ ကြိမ်မြောက် အာဆီယံ ထိပ်သီးအစည်းအဝေးပွဲသို့တက်ရောက်ရန် စက်တင်ဘာလ ၅ ရက်တွင် လာအိုနိုင်ငံသို့ရောက်ရှိလာခဲ့ကြောင်း သိရသည်။

အာဆီယံ ၁ဝ နိုင်ငံမှ ခေါင်းဆောင်များ နှင့် အခြားဆွေးနွေးဖက်နိုင်ငံများမှ ခေါင်းဆောင်များတက်ရောက်ကြမည့် ဒေသတွင်း အစည်းအဝေးပွဲမတိုင်ခင် ဆွေးနွေးပွဲမူကြမ်းများ နှင့် အပြီးသတ်ညှိနှိုင်းမှုများကို ဆွေးနွေးရန်အတွက် အဆင့်မြင့်အရာရှိများ၏ အကြိုညှိနှိုင်းအစည်းအဝေး(Prep-SOM) ကို စက်တင်ဘာလ ၅ ရက်(ယနေ့)တွင် ကျင်းပလျက်ရှိကြောင်း သိရသည်။
၂ဝ၁၆ ခုနှစ် အာဆီယံ စီးပွားရေး နှင့် ရင်းနှီးမြှုပ်နှံမှု အစည်းအဝေးကို စက်တင်ဘာလ ၅ ရက် မှ ၇ ရက်အထိ ကျင်းပသွားရန်ရှိပြီး ဖွင့်ပွဲအခမ်းအနားကို စက်တင်ဘာလ ၅ ရက် ည နေပိုင်းတွင် လာအိုနိုင်ငံဝန်ကြီးချုပ် Thongloun Sisoulith ကိုယ်တိုင် တက်ရောက်ဖွင့်လှစ်ပေးမည်ဖြစ်သည်။ အာဆီယံထိပ်သီးအစည်းအဝေးပွဲ နှင့်ဆက်စပ် ဆွေးနွေးပွဲများအဖြစ် အာဆီယံနိုင်ငံခြားရေးဝန်ကြီး ၊ စီးပွားရေး နှင့် ကုန်သွယ်ရေးဝန်ကြီး အစည်းအဝေးများကိုလည်း ဗီယန်ရှင်းမြို့၌ ကျင်းပသွားရန် ရှိသည်။
အာဆီယံ ၁ဝ နိုင်ငံမှ ထိပ်သီးခေါင်းဆောင်များ၏ အစည်းအဝေးကို စက်တင်ဘာလ ၆ ရက် နံနက်ပိုင်းတွင် ဗီယန်ရှင်းမြို့၌ ကျင်းပသွားရန် ရှိပြီး ယင်းနေ့ညနေပိုင်းတွင် ၂၈ ကြိမ်မြောက် အာဆီယံထိပ်သီးအစည်းအဝေးကို ဆက်လက်ကျင်းပသွားရန်ရှိကြောင်း သိရသည်။
အာဆီယံ နှင့် ဆွေးနွေးဖက်နိုင်ငံများဖြစ်သည့် သြစတြေးလျ ၊ အိန္ဒိယ ၊ နယူးဇီလန် ၊ ဂျပန် ၊ တောင်ကိုးရီးယား ၊ရုရှား နှင့် အမေရိကန်ပြည်ထောင်စုများနည်းတူ တရုတ်နိုင်ငံ ဝန်ကြီးချုပ် လီခဲ့ချန် လည်း အဆိုပါ အစည်းအဝေးကို တက်ရောက်မည်ဖြစ်သည်။
တရုတ်နိုင်ငံဝန်ကြီးချုပ်လီခဲ့ချန်သည် ၂၅ နှစ်ကြာ မိတ်ဖက်ဆက်ဆံရေးများအဖြစ် ဆွေးနွေးလာခဲ့သည့် ၁၉ ကြိမ်မြောက် အာဆီယံ-တရုတ် အစည်းအဝေးတွင် ယခုနှစ်အတွက် အာဆီယံဥက္ကဋ္ဌအဖြစ်တာဝန်ယူထားသည့် လာအိုနိုင်ငံဝန်ကြီးချုပ် Thongloun Sisoulith အပါအဝင် အခြား အာဆီယံခေါင်းဆောင်များ နှင့်လည်း ဆွေးနွေးသွားရန် ရှိကြောင်းသိရသည်။
အာဆီယံထိပ်သီးအစည်းအဝေး နှင့် ဆက်စပ်အစည်းအဝေးပွဲများတက်ရောက်ရန် အမေရိကန်နိုင်ငံသမ္မတ အိုဘားမားလည်း လာရောက်မည်ဖြစ်ပြီး ၎င်းခရီးစဉ်က အမေရိကန်သမ္မတ တစ်ဦး၏ ပထမဆုံး လာအိုနိုင်ငံခရီးစဉ်ဖြစ်ကြောင်း သိရသည်။(Xinhua)