Environment, Disasters & Accidents
မြောင်းမြမြို့အဝင် ကြိုးတံတား ပျက်ကျကာ ရှာဖွေ ကယ်ဆယ်ရေး လုပ်ငန်းများ ဆောင်ရွက်နေ
ရန်ကုန် ၊ ဧပြီ ၁ ရက်(ဆင်ဟွာ)
မြောင်းမြမြို့အဝင် ကြိုးတံတားသည် ယနေ့ နံနက် ၁ နာရီကျော် အချိန်တွင် ကုန်တင်ယာဉ် တစ်စီး ဖြတ်သန်း မောင်းနှင်စဉ် ပျက်ကျမှု ဖြစ်ပွားကာ ယာဉ်မောင်း အပါအဝင် ၂ ဦး ပျောက်ဆုံး နေသဖြင့် ရှာဖွေ ကယ်ဆယ်ရေး လုပ်ငန်းများ ဆောင်ရွက်နေကြောင်း မြန်မာနိုင်ငံ မီးသတ် ဦးစီး ဌာနထံမှ သိရသည်။
ဧရာဝတီတိုင်းဒေသကြီး၊ မြောင်းမြခရိုင်၊ မြောင်းမြမြို့နယ်အနီး၊ လပွ္ပတ္တာ-မြောင်းမြ-အိမ်မဲ-ကျောင်းကုန်း- ကျုံပျော် ကားလမ်းမပေါ်ရှိ ရွေးမြစ်အား ဖြတ်ကူး တည်ဆောက် ထားသည့် မြောင်းမြမြို့ အဝင် ကြိုးတံတား သည် ဧပြီ ၁ ရက် ၊ နံနက် ၁ နာရီ ၄၅ မိနစ် အချိန်တွင် ရန်ကုန်မှ မြောင်းမြသို့ မောင်းနှင်လာသော အဖြူရောင် (၆) ဘီး ကုန်တင်ယာဉ် ဖြတ်သန်းမောင်းနှင်စဉ် တံတားပျက်ကျမှု ဖြစ်ပွားခဲ့ကြောင်း သိရသည်။
ပျက်ကျသွားခဲ့သည့် မြောင်းမြမြို့အဝင် ကြိုးတံတားအား တွေ့ရစဉ်(ဓာတ်ပုံ-Myanmar Fire Services Department)
အဆိုပါကုန်တင်ယာဉ်သည် ရွေးမြစ်အတွင်းသို့ ပြုတ်ကျသွားပြီး ယာဉ်မောင်းပါ (၂) ဦး ပျောက်ဆုံးလျက် ရှိကြောင်း သတင်းရရှိသဖြင့် မြောင်းမြခရိုင်မီးသတ်ဦးစီးမှူးရုံးမှ မီးသတ်အမြန်ရေယာဉ် (၁)စီး ၊ စက်လှေ (၁)စီးတို့ဖြင့် ရှာဖွေကယ်ဆယ်ရေးလုပ်ငန်းများအား သက်ဆိုင်ရာအဖွဲ့အစည်းများနှင့် ပူးပေါင်း ဆောင်ရွက် လျက်ရှိကြောင်း သိရသည်။(Xinhua)
