Asia
အာဖဂန်နစ္စတန်နိုင်ငံတောင်ပိုင်း၌ ရေကြီးမှုဖြစ်ပွား ၊ အနည်းဆုံး လူ ၂ဝ ဦးသေဆုံး
ကဘူးလ် ၊ မတ် ၃ ရက်(ဆင်ဟွာ)
အာဖဂန်နစ္စတန်နိုင်ငံတောင်ပိုင်း ကန်ဒါဟာပြည်နယ်၌ ရေကြီးရေလျှံမှုဖြစ်ပွားပြီးနောက် အနည်းဆုံး လူ ၂ဝဦးသေဆုံးပြီး အခြားလူပေါင်းများစွာ ပျောက်ဆုံးလျက်ရှိကြောင်း တာဝန်ရှိသူများက ယနေ့(မတ် ၃ ရက်)တွင်ပြောကြားခဲ့သည်။
မိုးသည်းထန်စွာရွာသွန်းမှုကြောင့် ရေကြီးရေလျှံမှုဖြစ်ပွားခဲ့ရာမှ ကလေးငယ်တစ်ဦးအပါအဝင် အနည်းဆုံး လူ ၂ဝ ဦးသေဆုံးခဲ့ကြောင်း ၊ မတ်လ ၁ ရက် နံနက်အစောပိုင်းကတည်းက မိုးသည်းထန်စွာရွာသွန်းနေခဲ့ရာ လူနေအဆောက်အအုံများနှင့် မော်တော်ကားများရေမြုပ်ခဲ့ကြောင်း အာဖဂန်နစ္စတန်နိုင်ငံဆိုင်ရာ ကုလသမဂ္ဂလူသားချင်းစာနာမှုအကူအညီပေးရေး(OCHA) အဖွဲ့ရုံး၏ ထုတ်ပြန်ချက်တစ်စောင်တွင် ဖော်ပြထားသည်။
လူနေအိမ်များ နှင့် အခြေခံအဆောက်အအုံများ ပျက်စီးမှု (သို့မဟုတ်) အဖျက်ဆီးခံရမှု ဖြစ်ပေါ်ခဲ့ရကြောင်း ထုတ်ပြန်ချက်တွင် ဆက်လက်ဖော်ပြထားပြီး “ ပြည်နယ်သဘာဝဘေးဒဏ်စီမံခန့်ခွဲရေးကော်မတီက ကနဦးအစည်းဝေးတစ်ခုလုပ်ဆောင်နေကြောင်း နှင့် ပြုပြင်တည်ဆောက်ရေး အဖွဲ့တစ်ခုကိုလည်း စေလွှတ်ထားကြောင်း ၊ ကလေးငယ်အပါအဝင် အနည်းဆုံး လူ ၁ဝ ဦးထက်မနည်းပျောက်ဆုံးနေဆဲဖြစ်ကြောင်း” ၎င်းကဆိုသည်။
အာဖဂန်တာဝန်ရှိသူများ နှင့် ကုလသမဂ္ဂအေဂျင်စီ တို့သည် သဘာဝဘေးဒဏ်ခံစားရသူများအတွက် လိုအပ်ချက်များကိုဖြည့်ဆည်းပေးနိုင်ရန် ကြိုးပမ်းဆောင်ရွက်လျက်ရှိကြောင်း ထုတ်ပြန်ချက်တွင် ဆက်လက်ဖော်ပြထားသည်။
တစ်ချိန်တည်းမှာပင် နိုင်ငံ၏ နေရာအနှံ့အပြားတွင် ဆီးနှင်းများထူထပ်စွာကျဆင်းလျက်ရှိကြောင်း နှင့် ရေကြီးမှုများသည် နိုင်ငံအရှေ့ပိုင်းရှိပြည်နယ်အချို့တွင်လည်း ဖြစ်ပေါ်လျက်ရှိနေပြီး လူနေအိမ်များ နှင့် ဈေးဆိုင်ခန်းများ ရာပေါင်းများစွာ ပျက်စီးဆုံးရှုံးခဲ့ရကြောင်း သိရသည်။(Xinhua)