International Organizations
၂ဝ၅ဝ ပြည့်နှစ်တွင် ကမ္ဘာ့လူဦးရေ ၉.၇ ဘီလီယံ ရှိမည်ဟု ကုလသမဂ္ဂထုတ်ပြန်
ကုလသမဂ္ဂ ၊ ဧပြီ ၂ ရက်(ဆင်ဟွာ)
ကမ္ဘာ့လူဦးရေသည် လာမည့် ၂ဝ၅ဝ ပြည့်နှစ်တွင် ၉.၇ ဘီလီယံထိ ရောက်ရှိနိုင်မည်ဖြစ်ကြောင်း နှင့် ရာစုနှစ်အကုန်တွင် ၁၁ ဘီလီယံကျော်ထိ မြင့်တက်နိုင်ဖွယ်ရှိကြောင်း ဧပြီ ၁ ရက်တွင် ထုတ်ပြန်သည့် ကုလသမဂ္ဂ အစီရင်ခံစာတစ်စောင်အရ သိရသည်။
“ ၂ဝ၁၉ ခုနှစ်မှာ ကမ္ဘာ့လူဦးရေဟာ ၇.၇ ဘီလီယံ ရှိမယ်လို့ခန့်မှန်းရပြီး ဆက်ပြီးတော့လည်း တိုးပွားနေပါမယ်။ အဲဒီနှုန်းအတိုင်းဆက်တိုးနေရင်းက လာမယ့် ၂ဝ၅ဝ ပြည့်နှစ်မှာတော့ ၉.၇ ဘီလီယံအထိ ရောက်ရှိသွားမှာပါ။ အခု ရာစုနှစ်အကုန်မှာတော့ ကမ္ဘာ့လူဦးရေဟာ ၁၁ ဘီလီယံအထိ မြင့်တက်နိုင်ပါတယ်” ဟု ကုလသမဂ္ဂအစီရင်ခံစာတွင် ဖော်ပြထားသည်။
အဆိုပါ အစီရင်ခံစာကို ဧပြီ ၁ ရက်တွင် ကျင်းပသည့် ကုလသမဂ္ဂ လူဦးရေ နှင့် ဖွံ့ဖြိုးရေး ကော်မရှင်၏ ၅၂ ကြိမ်မြောက် အရေးကြီးအစည်းအဝေးတွင် ကုလသမဂ္ဂအထွေထွေအတွင်းရေးမှူးချုပ် အန်တိုနီယိုဂူတာရက်စ်က တင်သွင်းခဲ့ခြင်းဖြစ်သည်။
“ ကမ္ဘာ့လူဦးရေဟာ ဆက်ပြီး တိုးပွားနေပါတယ်။ သဘာဝအရင်းအမြစ် နဲ့ဂေဟစနစ် အပေါ်မှာ ထပ်ဆင့် သက်ရောက်မှုတွေ ရှိနေလိမ့်မယ်လို့မျှော်လင့်ရပါတယ်” ဟု အစီရင်ခံက ဆိုသည်။
“ ကမ္ဘာ့လူဦးရေဟာ ကြီးထွားလာတယ်။အသက်ရှည်လာတယ်။ ပိုပြီးတော့ ရွှေ့ပြောင်းသွားလာနေကြတယ်။ ပထဝီလူမှုစီးပွားရေးပုံစံဟာလည်း အရင်ချိန်တွေကထက် ပိုပြီးပြောင်းလဲလာပါတယ်” ဟု အစီရင်ခံစာတွင် ဖော်ပြထားသည်။
ယခုနှစ်သည် ၁၉၉၄ ခုနှစ်က အီဂျစ်နိုင်ငံ ကိုင်ရိုမြို့တွင် ကျင်းပခဲ့သည့် လူဦးရေ နှင့် ဖွံ့ဖြိုးတိုးတက်မှုဆိုင်ရာ အပြည်ပြည်ဆိုင်ရာ ညီလာခံ၏ အကောင်အထည်ဖော်ဆောင်ရွက်မှု အစီအစဉ် စတင်သည့် ကမ္ဘာလုံးဆိုင်ရာပူးပေါင်းဆောင်ရွက်မှုတွင် အောင်မြင်မှုမှတ်တိုင်တစ်ခု၏ ၂၅ နှစ်မြောက် အခါသမယဖြစ်ကြောင်း သိရသည်။(Xinhua)