ဇီကာဗိုင်းရပ်စ်ကူးစက်ခံထားရသည့် မိခင်များမှ ကျန်းမာသည့် ကလေးငယ် ၆ဦးမွေးဖွား

မာနာဂွာ၊ စက်တင်ဘာ ၂၈ ရက် (ဆင်ဟွာ)

အမေရိကတိုက်အလယ်ပိုင်း၊ နီကာရာဂွာနိုင်ငံ၌ ကိုယ်ဝန်ဆောင်စဉ်အတွင်း ဇီကာဗိုင်းရပ်စ်ပိုး ကူးစက်ခံထားရသည့် မိခင်များမှ ကျန်းမာရေးကောင်းမွန်သည့် ကလေးငယ်ခြောက်ဦးမွေးဖွားနိုင်ခဲ့ကြောင်း နီကာရာဂွာနိုင်ငံ၏ သမ္မတကတော် Rosario Murillo က စက်တင်ဘာ ၂၇ ရက်တွင်ပြောကြားခဲ့သည်။

အဆိုပါ မိခင်ခြောက်ဦးသည် ကိုယ်ဝန်ဆောင်စဉ်အတွင်း ဇီကာဗိုင်းရပ်စ်ပိုး ကူးစက်ထားခံရသော်လည်း ၎င်းတို့၏ ကလေးငယ် ခြောက်ဦးစလုံးသည် ကျန်းမာရေးအခြေအနေ အလွန်ကောင်းမွန်ကြောင်း သမ္မတကတော်က အတည်ပြုခဲ့သည်။

ကိုယ်ဝန်ဆောင်အမျိုးသမီးများတွင် ဇီကာဗိုင်းရပ်စ်ကူးစက်ခံရပါက မွေးဖွားလာသည့် ကလေးငယ်များ၌ ဦးခေါင်းသေးငယ်ခြင်း နှင့် အာရုံကြောချို့ယွင်းမှုများဖြစ်တတ်ကြောင်း ကမ္ဘာ့ကျန်းမာရေးအဖွဲ့အစည်း (WHO) က မတ် ၃၁ရက်တွင် ထုတ်ပြန်ခဲ့သည့် စစ်ဆေးတွေ့ရှိချက်များအရသိရသည်။

နီကာရာဂွာနိုင်ငံ ကျန်းမာရေးဝန်ကြီးဋ္ဌာန က စက်တင်ဘာ ၂၆ရက်မတိုင်ခင်အထိ နီကာရာဂွာနိုင်ငံတွင် ဇီကာဗိုင်းရပ်စ်ကူးစက်ခံထားရသူ ၁,၉၄၁ဦးရှိကြောင်းမှတ်တမ်းတင်ထားပြီး ၎င်းတို့အနက် ၁,၀၄၁ဦးမှာ ကိုယ်ဝန်ဆောင်အမျိုးသမီးများဖြစ်ကြောင်း ပြောကြားခဲ့သည်။

နီကာရာဂွာနိုင်ငံ ကျန်းမာရေးအာဏာပိုင်များက နိုင်ငံအတွင်း ဇီကာဗိုင်းရပ်စ်၊ သွေးလွန်တုပ်ကွေး စသည့် အေးဒီစ်ခြင်ကြောင့် ဖြစ်ပွားတတ်သည့် ရောဂါများအား တိုက်ဖျက်ရန် ကျန်းမာရေးအရေးပေါ်ကြေညာချက် ထုတ်ပြန်ခဲ့သည့် မေလမှစတင်၍ ကျန်းမာရေးသတိပေးချက်များအား မြှင့်တင်ထားကြောင်း သိရသည်။ (Xinhua)