ကယ်လီဖိုးနီးယား ပြည်နယ်တွင် ပေါက်ကွဲမှုဖြစ်ပွားရာ လူ၁ဦးသေ၊ ၃ဦး ဒဏ်ရာရရှိ

လော့စ်အိန်ဂျလိစ်၊ မေ ၁၆ ရက် (ဆင်ဟွာ)

အမေရိကန်နိုင်ငံ ကယ်လီဖိုးနီးယားပြည်နယ် ရှိ ရုံးအဆောက်အအုံတစ်ခုတွင် မေ ၁၅ ရက်က ပေါက်ကွဲမှုတစ်ခုဖြစ်ပွားခဲ့ရာ လူ တစ်ဦးသေဆုံးပြီး အခြားလူ ၃ဦး ထိခိုက်ဒဏ်ရာရရှိခဲ့ကြောင်း အာဏာပိုင်များကပြောကြားခဲ့သည်။

ပေါက်ကွဲမှုသည် Orange စီရင်စု Aliso Viejo မြို့ 11 Mareblu လမ်းပေါ်ရှိ ဆေးဝါးအဆောက်အအုံတစ်ခု၏ ပထမထပ် ၌ ဒေသစံတော်ချိန် နေ့လည် ၁း၁၀နာရီတွင် ဖြစ်ပွားခဲ့ပြီး မီးသတ်တပ်ဖွဲ့ နှင့် ရဲတပ်ဖွဲ့ဝင်များ အလျင်အမြန်ရောက်ရှိလာကြောင်း သိရသည်။

Orange စီရင်စုရဲဌာန မှ ပြည်သူ့ဆက်ဆံရေးအရာရှိ Carrie Braun က ပေါက်ကွဲမှုဖြစ်ပွားရခြင်း အကြောင်းရင်းကို မဆုံးဖြတ်နိုင်သေးကြောင်း ပြောကြားခဲ့သည်။

၎င်းက စုံစမ်းစစ်ဆေးမှုများ ဆောင်ရွက်နေဆဲဖြစ်ကြောင်း ဆင်ဟွာသို့ ဖုန်းဖြင့်ဖြေကြားခဲ့သည်။

ပေါက်ကွဲမှုဖြစ်ပွားပြီးနောက် မူကြိုကျောင်းတစ်ခုအပါအဝင် အနီးအနားရှိ အဆောက်အအုံအားလုံးမှ လူများကို တာဝန်ရှိသူများက နေရာရွှေ့ပြောင်းပေးခဲ့ကြောင်း သိရသည်။

အတည်ပြုနိုင်ခြင်းမရှိသည့် ကနဦးသတင်းရရှိချက်များအရ ယင်းပေါက်ကွဲမှုသည် ဓါတ်ငွေ့ပေါက်ကွဲမှုတစ်ခု ဖြစ်နိုင်ကြောင်းသိရှိရသော်လည်း City News Service က စီးပွားရေးဆိုင်ရာ အဆောက်အအုံတစ်ခုတွင် အလားတူ ဓါတ်ငွေ့ပေါက်ကွဲမှု ဖြစ်စဉ်မျိုး ရှားပါးကြောင်း Orange စီရင်စု မီးသတ်ဌာန မှ ဦးစီးမှူး Tony Bommarito ၏ ပြောကြားချက်ကို ကိုးကား၍ဖော်ပြခဲ့သည်။ (Xinhua)