အမေရိကန်က အီရန် ချစ်ကြည်ရေးသဘောတူညီချက်ကို ရပ်ဆိုင်းကြောင်း ကြေညာ

ဝါရှင်တန် ၊ အောက်တိုဘာ ၄ ရက်(ဆင်ဟွာ)

အမေရိကန်က ၁၉၅၅ ခုနှစ် ချစ်ကြည်ရေးသဘောတူညီချက်ကို ချိုးဖောက်သည်ဟူသော အီရန်၏ စွဲဆိုမှုကို နိုင်ငံတကာ တရားရုံး(ICJ)က စီရင်ပိုင်ခွင့်ရှိသည်ဟု ကြေညာပြီးနောက် အမေရိကန် နိုင်ငံခြားရေးဝန်ကြီးဌာန ဝန်ကြီး Mike Pompeo က အမေရိကန်အနေဖြင့် ၎င်းသဘောတူညီချက်ကို ရပ်ဆိုင်းကြောင်း အောက်တိုဘာ ၃ ရက်တွင် ကြေညာခဲ့သည်။

အမေရိကန်သည် အဆိုပါသဘောတူညီချက်ကို အစောကတည်းက ရပ်ဆိုင်းသင့်ကြောင်း ၊ အီရန် ယခင်က ပြုမူခဲ့သည့် မနှစ်မြို့ဖွယ်မလိုမုန်းတီးသည့် လုပ်ဆောင်မှုများက ယခုစွဲဆိုချက်ကို အဓိပ္ပါယ် မရှိဖြစ်စေ ကြောင်း Mike Pompeo က ယင်းနေ့တွင် ပြောကြားခဲ့သည်။

အောက်တိုဘာ ၃ ရက်နေ့ အစောပိုင်းတွင် နယ်သာလန်နိုင်ငံ Hagueမြို့ ရှိ နိုင်ငံတကာတရားရုံးက အီရန်၏စွဲဆိုချက်ကို စီရင်ပိုင်ခွင့်ရှိသည်ဟု ကြေညာပြီး အီရန်အပေါ် လူသားချင်း စာနာ ထောက်ထားမှု ဆိုင်ရာ ထောက်ပံ့ရေးပစ္စည်းများနှင့် အရပ်ဘက်လေကြောင်း လုံခြုံရေးဆိုင်ရာ ကုန်ပစ္စည်းများ ၊ ဝန်ဆောင်မှုများအား ပိတ်ဆို့အရေးယူနေခြင်းကို ချက်ချင်း ရပ်တန့်ရန် အမေရိကန်အား တောင်းဆို ခဲ့သည်။

နိုင်ငံအများ၏ဆန့်ကျင်ကန့်ကွက်မှုကို မျက်ကွယ်ပြု၍ ယခုနှစ် မေလတွင် အမေရိကန် အစိုးရသည် အီရန် နျူကလီးယားသဘောတူညီချက်မှ နုတ်ထွက်ရန် ကြေညာခဲ့ပြီး ပိတ်ဆို့မှုများ ပြန်လည် စတင် လုပ်ဆောင်ခဲ့သည်။ အမေရိကန်က ပိတ်ဆို့မှုများ ပြန်လည်လုပ်ဆောင်ခြင်းသည် ၁၉၅၅ ခုနှစ်တွင် နှစ်နိုင်ငံ ချုပ်ဆိုခဲ့သည့် “ချစ်ကြည်ရေး၊စီးပွားရေးနှင့်သံတမန်ရေးရာသဘောတူညီချက် ”ကို ဖောက်ဖျက်ခြင်းဖြစ်ကြောင်း၊ နိုင်ငံတကာ တရားရုံးအနေဖြင့် ၎င်းပိတ်ဆို့မှုများကို ချက်ချင်းရပ်တန့် စေရေး ဖြေရှင်းပေးရန် အီရန်က ဇူလိုင်လတွင် တောင်းဆိုခဲ့သည်။

နိုင်ငံတကာတရားရုံးသည် ကုလသမဂ္ဂ၏အဓိက တရားရေးဆိုင်ရာ အဖွဲ့အစည်း တစ်ခု ဖြစ်ပြီး နိုင်ငံတကာဥပဒေအရ နိုင်ငံများအကြား ဥပဒေ ဆိုင်ရာ အငြင်းပွားမှုများကို ဖြေရှင်းပေးသည့် အဖွဲ့အစည်းတစ်ခု ဖြစ်သည်။(Xinhua)