တိုယိုတာက မီးလောင်မှုအန္တရာယ်ဖြစ်နိုင်သည့် ချို့ယွင်းချက်ကြောင့် Prius, C-HR hybrids ကားစီးရေ ၁ သန်း ပြန်သိမ်း

ချီကာဂို၊ စက်တင်ဘာ ၆ ရက် (ဆင်ဟွာ)

တိုယိုတာ မော်တာ ကော်ပိုရေးရှင်းသည် Prius ကားနှင့် C-HR ကား စီးရေ ၁ သန်းကျော်အား မီးလောင်မှုအန္တရာယ်ဖြစ်နိုင်သည့် ချို့ယွင်းချက်ကြောင့် ကမ္ဘာ့ဈေးကွက်အတွင်းမှ ပြန်လည်သိမ်းဆည်းနေကြောင်း သိရသည်။

ဈေးကွက်အတွင်းမှ ပြန်လည်သိမ်းဆည်းမည့် ကားစီးရေစာရင်း စုစုပေါင်း ၁.၀၃ သန်းရှိပြီး ဂျပန်နိုင်ငံမှ ကားစီးရေ ၅၅၄,၀၀၀ စီးနှင့် အမေရိကန်နိုင်ငံမှ ကားစီးရေ ၁၉၂,၀၀၀ စီးပါဝင်ကြောင်း တိုယိုတာမှ ပြောခွင့်ရပုဂ္ဂိုလ် Jean-Yves Jault က စက်တင်ဘာလ ၅ ရက်တွင် ပြောကြားချက်အား ကိုးကား၍ Detroit News က သတင်းဖော်ပြထားသည်။

မော်တော်ယာဉ်တစ်စီး မီးခိုးထွက်ကြောင်း၊ သို့သော် ဒဏ်ရာရသူမရှိကြောင်း အစီရင်ခံစာ ထုတ်ပြန်ထားကြောင်း ဒေသခံ သတင်းစာက ဖော်ပြထားသည်။

ကားအတွင်း လျှပ်စစ်ယူနစ်ကို ချိတ်ဆက်သော အင်ဂျင်ဝါယာသိုင်းကြိုးက အချိန်ပိုသွားလျှင် အန္တရာယ်ရှိပြီး မီးလောင်ခြင်းပင်ဖြစ်နိုင်ကြောင်း ဂျပန်ကားထုတ်လုပ်သူ တိုယိုတာက ထုတ်ပြန်ချက်တွင် ပြောကြားထားသည်။

ဈေးကွက်အတွင်းမှ ပြန်လည်သိမ်းယူသောကားများသည် ယခုနှစ် မေလမတိုင်မီ ထုတ်လုပ်ထားသော Plug-in မူကွဲ အပါအဝင် Prius လက်ရှိမျိုးဆက်တိုင်းနှင့် C-HR Hybrid ဗားရှင်းများ ပါဝင်ကြောင်း သိရသည်။

ယခုလို ပြန်လည်သိမ်းယူသော ကားအရေအတွက်သည် မကြာသေးမီနှစ်များအတွင်း အများဆုံး ပြန်လည်သိမ်းယူမှုများအနက် တစ်ခုဖြစ်သည်။ ၂၀၁၆ ခုနှစ်က ဆီတိုင်ကီများ ယိုစိမ့်မှုအတွက် Prius အပါအဝင် ကားစီးရေ ၂.၈၇ သန်းနှင့် လေအိတ်ချို့ယွင်းချက်ကြောင့် ကားစီးရေ ၁.၄၃ သန်း ပြန်လည်သိမ်းယူခဲ့ကြောင်း သိရသည်။ (Xinhua)