ရှမ်းပြည်နယ် ကွတ်ခိုင်မြို့နယ် အတွင်း ငွေကျပ် ၃၈ ဘီလီယံကျော်တန်ဖိုးရှိ မူးယစ်ဆေးဝါးများနှင့် ချက်လုပ်ရာတွင် အသုံးပြုသည့် ပစ္စည်းများ သိမ်းဆည်းရမိ

ရန်ကုန် ၊ မတ် ၂ ရက်(ဆင်ဟွာ)

ရှမ်းပြည်နယ်(မြောက်ပိုင်း) ကွတ်ခိုင်မြို့နယ်အတွင်း ငွေကျပ် ၃၈ ဘီလီယံကျော်တန်ဖိုးရှိ မူးယစ်ဆေးဝါးများ၊ မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းများနှင့် ဆက်စပ် ပစ္စည်းများအား သုံးရက်ဆက်တိုက် ပိုင်ရှင်မဲ့ အသီးသီး သိမ်းဆည်းရမိခဲ့ကြောင်း တပ်မတော် ကာကွယ်ရေးဦးစီးချုပ်ရုံး၏ ထုတ်ပြန်မှုအရ သိရသည်။

ကွတ်ခိုင်မြို့နယ်တွင် လုံခြုံရေးဆောင်ရွက်လျက်ရှိသော တပ်ဖွဲ့ဝင်များသည် မူးယစ်ဆေးဝါးသတင်းများအရ ကောင်းခါးကျေးရွာနှင့် အနီးပတ်ဝန်းကျင်တို့၌ ဖေဖော်ဝါရီ ၂၈ ရက်တွင် မသင်္ကာဖွယ်ရာ အဆောက်အဦ ၂ လုံးအတွင်းမှ မူးယစ်ဆေးဝါးချက်လုပ်ရာတွင် အသုံးပြုသည့် ဂက်စ်မီးဖို ၁၅၈ လုံး၊ ဓာတုဆေးရည်ဗူး ၄၁၀ ဗူး၊ ၅ ဂါလန်ဆံ့ ဓာတုဆေးရည်ပုံး ၂၆၆ ပုံး၊ ဓာတုဆေးရည်အိတ် ၈၇ အိတ်၊ အက်ဆစ်များထည့်ထားသည့် ပေပါ ၁၅ လုံး၊ ဆေးပြားရိုက်စက် ၁ ခု နှင့် မူးယစ်ဆေးဝါး ချက်လုပ် သည့်ဆက်စပ်ပစ္စည်းမျိုးစုံအား သိမ်းဆည်း ရမိခဲ့ကြောင်း သိရသည်။

ဖေဖော်ဝါရီ ၂၉ ရက် နေ့လည်ပိုင်းတွင် မြေကျင်းတူး၍ သိုဝှက်ထားသည့် အက်ဆစ် ၅၀ ဂါလန်ဆံ့ ပေပါ ၂၈၁ လုံးတို့အား လည်းကောင်း၊ ညနေပိုင်းတွင် မသင်္ကာဖွယ်အဆောက်အဦတစ်လုံးအတွင်းမှ WY တံဆိပ်နှင့် R တံဆိပ်ရောရာ စိတ်ကြွဆေးပြား ၅၁ အိတ်၊ 88/1 တံဆိပ်ပါ စိတ်ကြွဆေးပြား ၆ အိတ်၊ တံဆိပ်ပါရှိမှုမရှိသော စိတ်ကြွဆေးပြား ၂၅ အိတ် စုစုပေါင်းစိတ်ကြွဆေးပြား ၁၆,၄၀၀,၀၀၀ ပြားနှင့် ဘိန်းဖြူဆပ်ပြာခွက် ၃,၃၀၀ ခွက်(၃၃,၀၀၀ဂရမ်ခန့်)တို့အား လည်းကောင်း သိမ်းဆည်း ရမိခဲ့ကြောင်း သိရသည်။

မတ်လ ၁ ရက် နံနက်ပိုင်းတွင် ပိုင်ရှင်မဲ့အဆောက်အဦတစ်လုံးအတွင်းမှ WY ၊ R ၊ 88/1 တံဆိပ်နှင့် တံဆိပ်မပါ အစိမ်းရောင်၊ လိမ္မော်ရောင်၊ ပန်းရောင်ရောရာ စိတ်ကြွဆေးပြား ၁,၅၄၀,၀၀၀ ပြား၊ ဘိန်းဖြူဆပ်ပြာခွက် ၁၄၀ ခွက်၊ ဆေးပြားရေတွက်စက် ၂ လုံး၊ အမှုန့်ကြိတ်စက် ၁ လုံး၊ DAF-XF အမျိုးအစား ၈ ဘီးခေါင်းတွဲယာဉ် ၁ စီး၊ တစ်ပါအမျိုးအစား ၁၀ ဘီးယာဉ် ၁ စီး၊ NISSAN အမျိုးအစား၂၂ ဘီးယာဉ် ၁ စီး၊ တစ်ပါအမျိုးအစား ၂ ကရောင်း ၆ ဘီးယာဉ် ၁ စီး၊ CHENGLONG အမျိုးအစား ၂ ကရောင်း ၆ ဘီးယာဉ် ၁ စီး၊ အက်ဆစ်ကော်ပေပါအပြာ ၁၂၆ လုံး၊ အက်ဆစ်သံပေပါအပြာ ၂၄ လုံး၊ ဂက်စ်အိုး ၁၆၀ လုံး၊ အမျိုးအစားစိစစ်ဆဲ အဖြူရောင်ကုန်ကြမ်းမှုန့် ၃၃ အိတ်၊ အရိုးမီးသွေးအိတ် ၂၅ အိတ်နှင့် ၅ ဂါလံဆံ့အက်ဆစ်ပုံး ၁၆ ပုံးတို့အား အသီးသီး ပိုင်ရှင်မဲ့သိမ်းဆည်းရမိခဲ့သည်။

အဆိုပါ သိမ်းဆည်းရမိ မော်တော်ယာဉ်များ၊ ငွေကျပ် ၃၈ ဘီလီယံကျော်တန်ဖိုးရှိ မူးယစ်ဆေးဝါးများ၊ မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းများနှင့် ဆက်စပ်ပစ္စည်းများအား သက်ဆိုင်ရာသို့ စနစ်တကျ လွှဲပြောင်းအပ်နှံသွားမည်ဖြစ်ကြောင်းနှင့် နယ်မြေလုံခြုံရေး လုပ်ငန်းများ ဆက်လက် ဆောင်ရွက် သွားမည်ဖြစ်ကြောင်း တပ်မတော် ကာကွယ်ရေးဦးစီးချုပ်ရုံးမှ ထုတ်ပြန်ခဲ့သည်။ (Xinhua)