ကလေးဝမြို့နယ်၌ Detonator (ဖောက်ခွဲရေးပစ္စည်း) ၄၀,၀၀၀ခု ဖမ်းဆီးရမိ

ရန်ကုန်၊ အောက်တိုဘာ ၁၇ ရက် (ဆင်ဟွာ)

ကလေးဝမြို့နယ်၌ Detonator (ဖောက်ခွဲရေးပစ္စည်း) အခု ၄၀,၀၀၀ ဖမ်းဆီးရမိခဲ့ကြောင်း ပြည်ထဲရေးဝန်ကြီးဌာန မှ ယနေ့ သတင်းထုတ်ပြန်သည်။

ဖြစ်စဉ်မှာ ၂၀၁၇ခုနှစ်၊ အောက်တိုဘာလ ၁၆ ရက်နေ့ ၁၈၄၀ အချိန် မူးယစ်တပ်ဖွဲ့စု (၅) (ကလေး)မှ ရဲတပ်ဖွဲ့ဝင်များ ၊ ကလေးခရိုင်ရဲတပ်ဖွဲ့မှူးရုံးမှ ရဲတပ်ဖွဲ့ဝင်များ၊ ကလေးဝ မြို့မရဲစခန်းမှ ရဲတပ်ဖွဲ့ဝင်များ ပါဝင်သောပူးပေါင်းအဖွဲ့သည် ကလေးဝ-ရေဦး-တန့်ဆည် ကားလမ်းမိုင်တိုင်(၁၀၄/၁၀၅)ကြား၌ ကလေးဝမြို့နယ်ဘက်မှ ရေဦးမြို့ဘက်သို့ သန်းနိုင်ဦး (၄၂)နှစ်၊ ဗမာ/ဗုဒ္ဓ၊ ရွှေသန့်စင်လုပ်ငန်း၊ (ဘ)ဦးသန်းထိုက်၊ ဟေမမာလာ(တောင်) ရပ်ကွက်၊ မဟာအောင်မြေမြို့နယ်နေသူ မောင်းနှင်ပြီး ပြည်ဖြိုးမောင်(၂၉)နှစ်၊ ဗမာ/ဗုဒ္ဓ၊ ရွှေသန့်စင်လုပ်ငန်း၊ (ဘ)ဦးကျော်ဌေး အင်ကျယ်ကျေးရွာ ပုသိမ်ကြီးမြို့နယ်နေသူ လိုက်ပါလာသည့် MDY-6E/ xxxx SURF ယာဉ်အား ရပ်တန့်စစ်ဆေးရာ ကားနောက်ခန်း ခရီးဆောင်အိတ်အတွင်းမှ Detonator (၄၀,၀၀၀) ခု တို့အား သိမ်းဆည်း ရမိခဲ့သဖြင့် ၂၁၀၀ အချိန် သန်းနိုင်ဦး ပါ(၂)ဦး(ဖမ်းမိ)အား ကလေးဝမြို့မရဲစခန်း (ပ)၃၀၄/၂၀၁၇၊ ပေါက်ကွဲစေတတ်သောပစ္စည်းများဆိုင်ရာ ဥပဒေပုဒ်မ ၅ အရ အမှုဖွင့် စစ်ဆေးလျက်ရှိကြောင်း သတင်းထုတ်ပြန်ချက်ထဲတွင် ပါရှိသည်။ (Xinhua)