မက္ကဆီကို နိုင်ငံ တွင် အင်အား ၇.၁ အဆင့်ရှိသော ငလျင် လှုပ်ခတ်မှုကြောင့် လူပေါင်း အနည်းဆုံး ၁၃၉ ဦး သေဆုံး

မက္ကဆီကိုစီးတီး ၊ စက်တင်ဘာ ၂၀ ရက် (ဆင်ဟွာ)

မက္ကဆီကို နိုင်ငံ အစိုးရ သတင်း ထုတ်ပြန်ချက်အရ စက်တင်ဘာ ၁၉ ရက်နေ့ ဒေသစံတော်ချိန် နေ့လယ်ပိုင်း အချိန်တွင် မက္ကဆီကို နိုင်ငံ အလယ်ပိုင်း ၌ အင်အား ရစ်(ခ်)တာစကေး ၇.၁ အဆင့်ရှိ ငလျင် တစ်ခု ဖြစ်ပွား ခဲ့သောကြောင့် လူပေါင်း အနည်းဆုံး ၁၃၉ ဦး သေဆုံး ခဲ့ကြောင်း သိရှိခဲ့ရသည်။

မက္ကဆီကို နိုင်ငံ ပြည်ထဲရေး ဝန်ကြီးဌာန လက်အောက်ရှိ အမျိုးသား ပြည်သူ့ကာကွယ်ရေး အဖွဲ့အစည်း တာဝန်ရှိသူ တစ်ဦး က ဒေသတွင်း မီဒီယာ ၏ တွေ့ဆုံမေးမြန်းမှု ကို ဖြေကြားခဲ့ရာတွင် ငလျင်ဖြစ်ပွား သည့် Morelos ပြည်နယ် တွင် လူပေါင်း ၆၄ ဦး သေဆုံးခဲ့ကြောင်း ၊ မြို့တော် မက္ကဆီကိုစီးတီး တွင် လူပေါင်း ၃၆ ဦး သေဆုံး ခဲ့ပြီး Puebla ပြည်နယ် တွင် လူပေါင်း ၂၉ ဦး သေဆုံးကာ ကျန်ပြည်နယ်များတွင် လူပေါင်း ၁၀ ဦး သေဆုံး ခဲ့ကြောင်း ၊ လက်ရှိချိန်တွင် ကယ်ဆယ်ရေး လုပ်ငန်းများ ဆောင်ရွက်နေပြီး လူများစွာမှာ ပြိုလဲခဲ့သည့် အဆောက်အဦ များအောက်တွင် ရောက်ရှိနေသဖြင့် စုစုပေါင်း သေဆုံးမှု စာရင်းသည် ပိုမို မြင့်တက်လာနိုင်ကြောင်း ပြောကြား ခဲ့သည်။

မက္ကဆီကို နိုင်ငံ အမျိုးသား ငလျင်ဌာန ၏ ထုတ်ပြန်ချက်အရ ငလျင်သည် ဒေသစံတော်ချိန် ၁၉ ရက်နေ့ နေ့လယ် ၁၃ နာရီ ၁၄ မိနစ် တွင် ဖြစ်ပွား ခဲ့ပြီး ငလျင် သည် Morelos ပြည်နယ် Axochiapan မြို့ အနောက်တောင်ပိုင်း ၁၂ ကီလိုမီတာ အကွာအဝေး တွင် ဗဟိုပြု၍ လှုပ်ခတ်ခဲ့ကြောင်း ၊ ငလျင် သည် မြေပြင်အောက်အနက် ၅၇ ကီလိုမီတာ တွင် ဗဟိုပြုလှုပ်ခတ် ခဲ့ပြီး မြို့တော် မက္ကဆီကိုစီးတီး တွင်ပင် ပြင်းထန်သည့် တုန်ခါမှု ကို ခံစားခဲ့ရကြောင်း ၊ ငလျင် ဖြစ်ပွားပြီးနောက် အချို့ဒေသ များတွင် လျှပ်စစ်မီးများ ပြတ်တောက် သွားခဲ့ပြီး အဆောက်အဦ ပေါင်း ၃၀ ခန့် ပြိုလဲ ခဲ့ကြောင်း သိရှိခဲ့ရသည်။

ယခု အကြိမ် မက္ကဆီကို နိုင်ငံ တွင် ဖြစ်ပွား ခဲ့သည့် ငလျင် သည် သီတင်းပတ် ၂ ပတ်အတွင်း ဒုတိယ အကြိမ်မြောက် လွန်စွာ ပြင်းထန်သည့် ငလျင် လှုပ်ခတ်ခြင်း ဖြစ်သည်။ စက်တင်ဘာ ၇ ရက်နေ့ ညပိုင်း အချိန်တွင် မက္ကဆီကို နိုင်ငံ Chiapas ပြည်နယ် အနောက်တောင်ပိုင်း ၁၃၇ ကီလိုမီတာ အကွာအဝေးရှိ ပင်လယ်ပြင်တွင် ဖြစ်ပွား သည့် အင်အား ရစ်(ခ်)တာစကေး (၈.၂) အဆင့် ရှိသော ငလျင်ကြောင့် လူပေါင်း အနည်းဆုံး ၉၈ ဦးသေဆုံး ခဲ့ကြောင်း သိရှိရသည်။(Xinhua)