ရုရှာနိုင်ငံ၌ An-148 ဂျက်လေယာဉ်ပျက်ကျ ၊ ယာဉ်ပေါ်လိုက်ပါလာသူအားလုံး သေဆုံးဖွယ်ရှိ

မော်စကို ၊ ဖေဖော်ဝါရီ ၁၂ ရက်(ဆင်ဟွာ)

ရုရှားနိုင်ငံ မော်စကိုလေဆိပ်မှ ထွက်ခွာလာသော လူ ၇၁ ဦးလိုက်ပါလာသည့် လေယာဉ်သည် ပျံတက်ပြီး မကြာမီအချိန်အတွင်း ပျက်ကျမှုဖြစ်ပွားခဲ့ကြောင်း ၊ လေယာဉ်ပေါ်လိုက်ပါသူ ခရီးသည်များ နှင့် လေယာဉ်အမှုထမ်းအားလုံး အသက်ရှင်ကျန်ရစ်သူမရှိကြောင်း အရေးပေါ်ကယ်ဆယ်ရေးဌာနမှ သတင်းအရင်းအမြစ်က Interfax သတင်းအေဂျင်စီသို့ဖေဖော်ဝါရီ ၁၁ ရက်တွင် ပြောကြားခဲ့သည်။

ခရီးသည် ၆၅ ဦး နှင့် လေယာဉ်အမှုထမ်း ၆ ဦး လိုက်ပါလာသော Saratov လေကြောင်းလိုင်းမှ Antonov-148 ဂျက်လေယာဉ်သည် ရုရှားနိုင်ငံမော်စကိုမြို့Domodedovo လေဆိပ်မှ နိုင်ငံအနောက်ပိုင်း Orenburg ဒေသရှိ Orsk လေဆိပ်သို့ဦးတည်ပျံသန်းလာခဲ့ခြင်းဖြစ်သည်။

“ Argunovo ကျေးရွာအနီးမှာ လေယာဉ်ပျက်ကျသွားတာပါ။ လေယာဉ်အမှုထမ်းတွေရော ခရီးသည်တွေပါ အသက်ရှင်ကျန်ရစ်မယ့် အခွင့်အရေးမရှိပါဘူး” ဟု သတင်းအရင်းအမြစ်က ဆိုသည်။သေဆုံးသူ ၂ ဦး ၏ ရုပ်အလောင်းကို ရှာဖွေတွေ့ရှိထားပြီးဖြစ်ကြောင်း Interfax သတင်းဌာန၏ နောက်ထပ် ဖော်ပြချက်တစ်ခု အရသိရသည်။

ရုရှားနိုင်ငံပို့ဆောင်ရေးဝန်ကြီးဌာနက Interfax သတင်းဌာနသို့ပြောကြားခဲ့ရာတွင် လူ့အမှား နှင့် ရာသီဥတုအခြေအနေများအပါအဝင် လေယာဉ်ပျက်ကျမှုဖြစ်ပွားနိုင်သည့် အကြောင်းတရားများစွာရှိကြောင်း ဆိုထားသည်။ရုရှားနိုင်ငံ စုံစမ်းထောက်လှမ်းရေးကော်မတီက လေယာဉ်ပျက်ကျမှုကို စတင်စုံစမ်းစစ်ဆေးလျက်ရှိပြီး ရုရှားနိုင်ငံပို့ဆောင်ရေးဝန်ကြီးဌာန ဝန်ကြီး Maksim Sokolov သည် အခင်းဖြစ်နေရာသို့သွားရောက်ကြည့်ရှုခဲ့ကြောင်း သိရသည်။(Xinhua)