ဂျပန်နိုင်ငံရှိ အသက်အကြီးဆုံးအဘွားအို အသက် ၁၁၇ နှစ်တွင် ကွယ်လွန်

တိုကျို၊ ဇူလိုင် ၂၇ ရက် (ဆင်ဟွာ)

ဂျပန်နိုင်ငံရှိ အသက် ၁၁၇ နှစ်အရွယ်ရှိ အသက်အကြီးဆုံး အဘွားအို ချီယို မီယာကို (Chiyo Miyako) သည် ဇူလိုင်လ ၂၂ ရက်က ကွယ်လွန်သွားခဲ့ကြောင်း ကျန်းမာရေး၊ အလုပ်သမားနှင့် လူမှုဝန်ထမ်း ဝန်ကြီးဌာနက ဇူလိုင်လ ၂၆ ရက်တွင် ပြောကြားလိုက်သည်။

၁၉၀၁ ခုနှစ် မေလ ၂ ရက်တွင် မွေးဖွားခဲ့သော မီယာကိုသည် ဧပြီလက အသက် ၁၁၇ နှစ်အရွယ် ဂျပန်အမျိုးသမီး နာဘီ တာဂျိမာ (Nabi Tajima) သေဆုံးပြီးနောက် ဂျပန်နိုင်ငံ၏ အသက်အကြီးဆုံး အမျိုးသမီးနှင့် အသက်အကြီးဆုံး ပုဂ္ဂိုလ်ဖြစ်လာခဲ့သည်။ ၎င်းသည် ကမ္ဘာ့ အသက်အကြီးဆုံး သက်ရှိ ပုဂ္ဂိုလ်လည်း ဖြစ်နိုင်ခြေရှိသည်။

မီယာကို သေဆုံးပြီးနောက် ၁၉၀၃ ခုနှစ် ဇန်နဝါရီလ ၂ ရက်တွင် မွေးဖွားခဲ့သူ ကန်နဲ တာနာကာ (Kane Tanaka) သည် ယခုအခါ ဂျပန်နိုင်ငံ၏ အသက်အကြီးဆုံး ပုဂ္ဂိုလ်ဖြစ်လာပြီး အသက်အရွယ်အားဖြင့် ၁၁၅ နှစ်ရှိပြီ ဖြစ်ကြောင်း သိရသည်။ဂျပန်နို်င်ငံရှိ အသက်အကြီးဆုံးအမျိုးသားမှာ အသက် ၁၁၃ ခုနှစ်အရွယ် မာဆာဇို နိုနာကာဖြစ်ပြီး ကမ္ဘာ့အသက်အကြီးဆုံး သက်ရှိအမျိုးသားအဖြစ် ဧပြီလက ဂင်းနစ်စံချိန်တင်ခဲ့ကြောင်း သိရသည်။ (Xinhua)