ပါပူဝါနယူးဂီနီ နိုင်ငံတွင် ရစ်ချ်တာစကေး ၇.၉ ရှိ ငလျင်ပြင်းတစ်ခု လှုပ်ခတ်ပြီးနောက် ဆူနာမီ သတိပေးချက် ထုတ်ပြန်

ဆစ်ဒနီ၊ ဇန်နဝါရီ ၂၂ ရက် (ဆင်ဟွာ)

ဟာဝိုင်ရီပြည်နယ် ပစိဖိတ်ဆူနာမီသတိပေးချက်စင်တာ သည် ပါပူဝါနယူးဂီနီနိုင်ငံ (PNG) တွင် ဇန်နဝါရီ ၂၂ရက်တွင် ရစ်ချ်တာစကေး ၇.၉ ရှိသည့် အင်အားအလွန်ပြင်းထန်သော ငလျင်ပြင်းတစ်ခုနှင့် နောက်ဆက်တွဲငလျင်များ လှုပ်ခတ်ပြီးနောက် ပစိဖိတ်ဒေသအတွက် ဆူနာမီသတိပေးချက် ထုတ်ပြန်ခဲ့ကြောင်း သိရသည်။

ပါပူဝါနယူးဂီနီနိုင်ငံ ကိုယ်ပိုင်အုပ်ချုပ်ခွင့်ရ Bougainville ကျွန်းပေါ်ရှိ Pangunaမြို့ အနောက်ဘက် ၄၇ကီလိုမီတာ ၌ ဒေသစံတော်ချိန် ၁၅း၃၀နာရီတွင် အဆိုပါ ငလျင်ပြင်းလှုပ်ခတ်ခဲ့ကြောင်း အမေရိကန် ဘူမိဗေဒဆိုင်ရာ လေ့လာတိုင်းတာရေးအဖွဲ့ (USGS) က ပြောကြားခဲ့ပြီး သြစတြေးလျနိုင်ငံ ဘူမိဗေဒအဖွဲ့ကလည်း အဆိုပါ ဧရိယာအတွင်း အင်အား ၆.၂ရှိသည့် နောက်ဆက်တွဲငလျင်တစ်ခုကို တိုင်းတာရရှိခဲ့ကြောင်း ပြောကြားခဲ့သည်။

USGS ၏ ကနဦးတိုင်းတာချက်များအရ ပထမဆုံးငလျင်၏ ပြင်းအားသည် ရစ်ချ်တာ စကေး ၈.ဝရှိပြီး ဆော်လမွန်ကျွန်းများတွင် လှုပ်ခတ်ခဲ့ခြင်းဖြစ်ကြောင်း သိရသည်။

ငလျင်သည် မြေပြင်အနက် ၁၅၀ကီလိုမီတာကို ဗဟိုပြု၍ လှုပ်ခတ်ခဲ့ကြောင်း USGS ကပြောကြားခဲ့ပြီး ကျွန်းပေါ်တွင် ငလျင်ကြောင့် အပျက်အစီးများ ဖြစ်ပေါ်နိုင်ကြောင်း သြစတြေးလျနိုင်ငံ ဘူမိဗေဒအဖွဲ့ ငလျင်ပညာရှင် Spiro Spiliopoulos က ဆင်ဟွာသို့ ပြောကြားခဲ့သည်။

ပစိဖိတ်ဆူနာမီသတိပေးချက်စင်တာ က သြစတြေးလျကမ်းရိုးတန်းအတွက် ဆူနာမီသတိပေးချက် မထုတ်ပြန်သော်လည်း ပစိဖိတ်ဒေသ နှင့် အင်ဒိုနီးရှားနိုင်ငံ တစ်လျှောက် ယင်း ငလျင်ပြင်းကြောင့် အန္တရာယ်ရှိသည့် ဆူနာမီရေလှိုင်းများ ဖြစ်ပေါ်လာနိုင်ကြောင်း ပြောကြားခဲ့ပြီး နောက်ပိုင်းတွင် ပါပူဝါနယူးဂီနီနိုင်ငံ နှင့် ဆော်လမွန်ကျွန်း၏ ကမ်းရိုးတန်းအချို့တွင်သာ ဆူနာမီရေလှိုင်းများ ဖြစ်ပေါ်လာနိုင်ကြောင်း သတိပေးချက်အားလျှော့ချခဲ့သည်။ (Xinhua)