မြန်မာနိုင်ငံတော်ဗဟိုဘဏ်က နိုင်ငံတကာ ငွေပေးချေကတ်များနှင့် ပေးချေနိုင်သည့် ပမာဏအား ထက်ဝက်လျှော့ချ၍ ပြောင်းလဲသတ်မှတ်

ရန်ကုန် ဧပြီ ၉ ရက် (ဆင်ဟွာ)

နိုင်ငံတကာ ငွေပေးချေကတ်များဖြစ်သော Visa card ၊ Master card နဲ့ UPI/JCB ၊ prepaid နှင့် credit card များဖြင့် ပေးချေနိုင်သော ပမာဏအား ထက်ဝက်လျှော့ချ၍ ပြောင်းလဲသတ်မှတ်လိုက်ကြောင်း မြန်မာနိုင်ငံတော်ဗဟိုဘဏ်၏ ထုတ်ပြန်ချက်အရ သိရသည်။မြန်မာနိုင်ငံတော်ဗဟိုဘဏ်မှ ဒုတိယဥက္ကဋ္ဌ ဦးဝင်းသော်က “Visa ၊ Master နဲ့ UPI international prepaid card တွေကို တစ်လ အများဆုံးထုတ်ယူငွေပမာဏ အမေရိကန်ဒေါ်လာ ၅၀၀၀ သတ်မှတ်ထားရာကနေ အခု ၂၅၀၀ လျှော့လိုက်ပါတယ်။ Visa ၊ Master နဲ့ UPI/ JCB international credit card တွေကို တစ်လအများဆုံးထုတ်ယူငွေပမာဏ မြန်မာငွေ သိန်း ၅၀ သတ်မှတ်ထားရာကနေ တစ်လကို အများဆုံးထုတ်ယူငွေ ပမာဏ ၂၅ သိန်းကို ပြောင်းလဲသတ်မှတ်လိုက်တယ်ဆိုတာမှန်ပါတယ်’’ ဟု ဆင်ဟွာသို့ ယနေ့ ဧပြီ ၉ ရက်တွင် အတည်ပြုပြောကြားသည်။

ယခင်က ပြည်ပသို့ သွားရောက်မည့် မြန်မာနိုင်ငံသားများ အနေဖြင့် Retail ငွေပေးချေမှုများ အဆင်ပြေချောမွေ့စွာ ဆောင်ရွက်နိုင်ရန်နှင့် ငွေကြေးသယ်ဆောင်ရသည့် အခက်အခဲများ လျော့နည်းသက်သာစေရန် International Prepaid Card (MasterCard/ VISA/UPI/ Prepaid Card ) ထုတ်ဝေခွင့်ကို တစ်လလျှင် ကတ်တစ်ကတ် အများဆုံးအသုံးပြုနိုင်သည့်ပမာဏ အမေရိကန်ဒေါ်လာ ၅၀၀၀ သတ်မှတ်၍ လည်းကောင်း၊ International Card (MasterCard/ VISA/UPI/JCB/Credit Card)အသုံးပြုနိုင်သည့် ပမာဏသတ်မှတ်ချက်ခြင်းအား ကတ်အသုံးပြုမည့်သူ၏ ဝင်ငွေပေါ်မူတည်၍ တစ်လလျှင် ကတ်တစ်ကတ် အများဆုံးအသုံးပြုနိုင်မည့်ပမာဏ ကျပ်သိန်း ၅၀ သတ်မှတ်၍လည်းကောင်း ခွင့်ပြုထားခဲ့ကြောင်း ဗဟိုဘဏ်၏ ထုတ်ပြန်ချက်တွင်ပါရှိသည်။

ယခုအခါ ပြည်တွင်းဘဏ်များအနေဖြင့် International Card များထုတ်ဝေရာတွင် တစ်လလျှင် ကတ်တစ်ကတ် အများဆုံအသုံးပြုနိုင်မည့်ပမာဏအား ပြင်ဆင်သတ်မှတ်ခဲ့ခြင်းဖြစ်ပြီး ကတ်လုပ်ငန်းများအား ပုံမှန်အတိုင်းဆောင်ရွက်သွားရမည်ဖြစ်ကြောင်း ဗဟိုဘဏ်၏ ထုတ်ပြန်ချက်အရ သိရသည်။ (Xinhua)