၃၁ ကြိမ်မြောက် ဆီးဂိမ်းပြိုင်ပွဲအတွက် စခန်းသွင်းလေ့ကျင့်နေသည့် မြန်မာ့လက်ရွေးစင် အမျိုးသမီးဘောလုံးအသင်း တောင်ကိုရီးယားနိုင်ငံ၌ ခြေစမ်းပွဲများယှဉ်ပြိုင်ကစားမည်

ရန်ကုန်၊ ဧပြီ ၂၃ ရက် (ဆင်ဟွာ)

၃၁ ကြိမ်မြောက် ဆီးဂိမ်းပြိုင်ပွဲအတွက် စခန်းသွင်းလေ့ကျင့်နေသည့် မြန်မာ့လက်ရွေးစင်အမျိုးသမီးဘောလုံး အသင်း သည် တောင်ကိုရီးယားနိုင်ငံ၌ သွားရောက်လေ့ကျင့်ကာ ခြေစမ်းပွဲများယှဉ်ပြိုင်ကစားမည်ဖြစ်ကြောင်း မြန်မာနိုင်ငံ ဘောလုံးအဖွဲ့ချုပ်မှ သိရသည်။

မြန်မာနိုင်ငံဘောလုံးအဖွဲ့ချုပ်မှ တာဝန်ရှိသူတစ်ဦးက “မြန်မာ့လက်ရွေးစင်အမျိုးသမီးဘောလုံးအသင်းက တောင်ကိုရီးယားနိုင်ငံကို မနက်ဖြန် ဧပြီလ ၂၄ ရက်နေ့မှာ ထွက်ခွာကြမှာပါ။ လေ့ကျင့်မှုတွေပြုလုပ်ပြီး ခြေစမ်းပွဲ ၃ ပွဲ ကစားဖို့ရှိပါတယ်’’ ဟုဆင်ဟွာသို့ ဧပြီ ၂၃ ရက်တွင်ပြောသည်။

မြန်မာ့လက်ရွေးစင်အမျိုးသမီးဘောလုံးအသင်းသည် တောင်ကိုရီးယားခရီးစဉ်သို့ ကစားသမား ၂၂ဦးကို ခေါ်ဆောင်သွားမည်ဖြစ်ကြောင်း သိရသည်။ မြန်မာ့လက်ရွေးစင် အမျိုးသမီးဘောလုံးအသင်းသည် ဆီးဂိမ်း ပြိုင်ပွဲတွင် ထိုင်း၊စင်ကာပူ၊ လာအို အသင်းတို့နှင့် အုပ်စုတစ်ခုတည်း ကျရောက်လျက်ရှိကြောင်း မြန်မာနိုင်ငံ ဘောလုံးအဖွဲ့ချုပ်မှ သိရသည်။ (Xinhua)