မိုးကုတ်မြို့နယ်တွင် ငွေကျပ် ၁.၉ ဘီလီယံကျော် တန်ဖိုးရှိ ဘိန်းဖြူများ နှင့် တရားခံ (၃)ဦးဖမ်းမိ

ရန်ကုန်၊ ဒီဇင်ဘာ ၁၇ ရက် (ဆင်ဟွာ) ရေးသားသူ/အိမွန်ကျော်

မန္တလေးတိုင်းဒေသကြီး မိုးကုတ်မြို့နယ် လယ်ကြီးစစ်ဆေးရေးဂိတ်တွင် ငွေကျပ် ၁.၉ ဘီလီယံကျော်တန်ဖိုးရှိ ဘိန်းဖြူများ နှင့် တရားခံ(၃)ဦးဖမ်းဆီးရမိခဲ့ကြောင်း မြန်မာနိုင်ငံ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများအန္တရာယ်တားဆီး ကာကွယ်ရေး ဗဟိုအဖွဲ့(CCDAC)က ယနေ့ သတင်း ထုတ်ပြန်ခဲ့သည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ကြိုတင်သတင်းရထားသည့် ယာဉ်အမျိုးအစား/အရောင်/နံပါတ်တို့အရ ဒီဇင်ဘာလ ၁၅ ရက် ၊ ညနေ ၅ နာရီအချိန်တွင် မိုးကုတ်မြို့နယ်၊ လယ်ကြီးစစ်ဆေးရေးဂိတ်၌ မိုင်းရယ်မြို့ဘက်မှ မိုးကုတ်မြို့ဘက်သို့ ဦးတည် မောင်းနှင်လာသည့် ISUZU ၆ ဘီးမော်တော်ယာဉ်ကိုရှာဖွေရာ ယာဉ်ကိုယ်ထည်ကြမ်းခင်းအောက်တွင် အံဝှက်ပြုလုပ်ထားပြီး ထည့်သွင်း သယ်ဆောင်လာသည့် ဘိန်းဖြူ ၂၇.၃၅ ကီလို သိမ်းဆည်းရမိခဲ့ခြင်းဖြစ်သည်။

အဆိုပါ ဘိန်းဖြူများသယ်ဆောင်လာသည့် ယာဉ်မောင်းအား စစ်ဆေးဖော်ထုတ်ချက်အရ သိမ်းဆည်းရမိသော ဘိန်းဖြူများအား မိုင်းရယ်မြို့မှ မိုးကုတ်မြို့သို့ သယ်ဆောင်ရာတွင် တာဝန်ခံသယ်ဆောင် လာသည့် ဆန်းမင်းနိုင် မောင်းနှင်ပြီး စိုင်းမင်းသူ လိုက်ပါလာသည့် AD VAN အမျိုးအစားမော်တော်ယာဉ်သည် ရှေ့မှမောင်းနှင်သွားကြောင်းသိရှိရသဖြင့် ညနေ ၆ နာရီခန့်တွင် မိုးကုတ်မြို့၊ ကင်းချောင်းရေတံခွန် ရှေ့တွင် ယင်း တရားခံများအား ထပ်မံ ဖမ်းဆီးရမိခဲ့ကြောင်း သိရသည်။

ယင်းထပ်မံဖမ်းဆီးရမိသူများထဲမှ တစ်ဦးသည် စစ်ကိုင်းတိုင်းဒေသကြီး၊ ဝန်းသိုမြို့နယ်တွင် ၂၀၂၀ ပြည့်နှစ်၊ ဇွန်လ ၁၃ ရက်က စိတ်ကြွရူးသွပ်ဆေးပြား ၂၁၂,၀၀၀ ပြားနှင့် ဘိန်းဖြူ ဝ.၂ ကီလို ဖမ်းဆီးရမိသည့်အမှုမှ မူးယစ်ဆေးဝါးများသယ်ဆောင်သူ ကွင်းဆက်တရားခံပြေးတစ်ဦးဖြစ်ကြောင်း သိရသည်။ (Xinhua)