Politics, Law & Military
အာဇာနည်နေ့အခမ်းအနား အောင်မြင်စွာ ကျင်းပနိုင်ရေး လုံခြုံရေး တိုးမြှင့်ထား
ရန်ကုန် ၊ ဇူလိုင် ၁၆ ရက်(ဆင်ဟွာ)
ဇူလိုင်လ ၁၉ ရက်နေ့တွင် ကျရောက်မည့် အာဇာနည်နေ့အခမ်းအနားကို ဗဟန်းမြို့နယ်ရှိ အာဇာနည် ဗိမာန်၌ ကျင်းပမည်ဖြစ်ရာ အောင်မြင်စွာ ကျင်းပနိုင်ရေးအတွက် ရန်ကုန် တိုင်းဒေသကြီးရဲတပ်ဖွဲ့မှ လုံခြုံရေးတိုးမြှင့် ဆောင်ရွက် ထားကြောင်း ပြန်ကြားရေး ဝန်ကြီးဌာနမှ ထုတ်ပြန်ခဲ့သည်။
အာဇာနည်နေ့တွင် အများပြည်သူများ ကြည့်ရှုလေ့လာနိုင်ရန် ဖွင့်လှစ်ထားသည့် ဝန်ကြီးများရုံး(ဟောင်း) ၊ ဗိုလ်ချုပ်အောင်ဆန်းပြတိုက် ၊ ဗိုလ်ချုပ်ကြေးရုပ် တို့တွင် ဘေးအန္တရာယ် ကင်းရှင်းစွာဖြင့် လာရောက် လေ့လာနိုင်စေရန် လုံခြုံရေး အပြည့် အဝ ချထားကြောင်း သိရသည်။
ထို့အတူ ရန်ကုန်တိုင်းဒေသကြီးရဲတပ်ဖွဲ့အနေဖြင့် အာဇာနည်နေ့မတိုင်မီ ဇူလိုင် ၁၃ ရက်မှစ၍ မြို့နယ် အသီးသီးတွင် ယာဉ်စစ်ပိတ်ဆို့စစ်ဆေး ဆောင်ရွက်ခြင်း၊ မြို့ဝင်/ထွက်ဂိတ်များတွင် ပူးပေါင်းအဖွဲ့များဖြင့် စစ်ဆေးဆောင်ရွက်လျက် ရှိပြီး နယ်မြေအတွင်း ကင်းလှည့်စောင့်ရှောက်ခြင်း ကို မော်တော်ယာဉ်၊ ဆိုင်ကယ်၊ စက်ဘီး၊ ခြေကျင်လှည့်ကင်းများဖြင့် ချိတ်ဆက်ဆောင်ရွက် လျက်ရှိသည့်အပြင် ခရိုင်လေးခရိုင်အတွင်း၌ လည်း ခိုး၊ ဆိုး၊ လုယက်မှုများ မဖြစ်ပွားစေရေး အတွက် စွန်ရဲစီမံချက်အဆင့်(၃)ဖြင့် ဖော်ထုတ် ဖမ်းဆီး ဆောင်ရွက်လျက် ရှိကြောင်း သိရသည်။(Xinhua)
