တူနီးရှားနိုင်ငံ သမ္မတရွေးကောက်ပွဲအား စက်တင်ဘာလ ၁၅ ရက်တွင် ကျင်းပမည်

တူးနစ်၊ ဇူလိုင် ၂၆ ရက် (ဆင်ဟွာ)

တူနီးရှားနိုင်ငံတွင် သမ္မတရွေးကောက်ပွဲ ပထမအကျော့အား စက်တင်ဘာလ ၁၅ ရက်တွင် ပြုလုပ်မည်ဖြစ်ကြောင်း ရွေးကောက်ပွဲဆိုင်ရာ သီးခြားလွတ်လပ်သော အဆင့်မြင့်အာဏာပိုင်အဖွဲ့ (ISIE) က ဇူလိုင်လ ၂၅ ရက်တွင် ကြေညာလိုက်သည်။

အဆိုပါ နေ့ရက်အား ISIE ပြောခွင့်ရပုဂ္ဂိုလ် ဟတ်စ်နာ ဘန် ဆလီမန်း (Hasna Ben Slimane) က ပြည်တွင်းမီဒီယာများအား အတည်ပြုပြောကြားခဲ့သည်။ISIE က ထိုကြေညာချက်အား တူနီးရှား သမ္မတ ဘီဂျီ ကတ် အက်ဆက်ဘ်စီ (Beji Caid Essebsi) ဇူလိုင်လ ၂၅ ရက် နံနက်ပိုင်းက ကွယ်လွန်ခဲ့ပြီးနောက် ထုတ်ပြန်ခဲ့ခြင်းဖြစ်သည်။

“အောက်တိုဘာလ ၆ ရက်မှာ လုပ်ဖို့စီစဉ်ထားတဲ့ ဥပဒေပြုရွေးကောက်ပွဲကတော့ အပြောင်းအလဲမရှိပါဘူး” ဟု ISIE ဥက္ကဋ္ဌ နာဘီလ် ဘက်ဖ်ဖောင် (Nabil Baffoun) က တရားဝင်ကြေညာချက်တစ်စောင်၌ အတည်ပြု ပြောကြားထားသည်။သမ္မတ အက်ဆက်ဘ်စီ ကွယ်လွန်ပြီး အချိန်အနည်းငယ်အကြာတွင် တူနီးရှား လွှတ်တော်ဥက္ကဋ္ဌ Mohamed Ennaceur ကအချိန်ကာလအားဖြင့် ၄၅ ရက်မှ အများဆုံး ရက် ၉၀ အထိ ယာယီသမ္မတအဖြစ် တာဝန်ထမ်းဆောင်ရန် ကျမ်းသစ္စာကျိန်ဆိုခဲ့သည်။ထိုကာလအတွင်း နိုင်ငံ၏ ဖွဲ့စည်းပုံအခြေခံဥပဒေနှင့်အညီ သမ္မတရွေးကောက်ပွဲ ကျင်းပသွားမည်ဖြစ်ကြောင်း သိရသည်။ (Xinhua)