အစ္စရေးနိုင်ငံက F-35 ကိုယ်ပျောက်ဂျက်တိုက်လေယာဉ်သစ်နှစ်စင်း ထပ်မံရရှိ

ဂျေရုဆလမ် ၊ ဇူလိုင် ၁၅ ရက်(ဆင်ဟွာ)

အစ္စရေးနိုင်ငံလေတပ်သည် အမေရိကန်ထံမှ F-35 ကိုယ်ပျောက်ဂျက်တိုက်လေယာဉ်သစ် နှစ်စင်းကို ဇူလိုင် ၁၄ ရက်တွင် ထပ်မံရရှိခဲ့ကြောင်း စစ်ဘက်ပြောရေးဆိုခွင့်ရှိသူတစ်ဦးက ဆိုသည်။

၎င်းဂျက်တိုက်လေယာဉ် နှစ်စင်းသည် အစ္စရေးနိုင်ငံတောင်ပိုင်း Nevatim လေတပ်အခြေစိုက်စခန်းသို့ရောက်ရှိလာခဲ့ပြီး နိုင်ငံ၏ F-35 တိုက်လေယာဉ်အုပ်စုကို ထပ်မံအားဖြည့်ပေးခဲ့ကြောင်း သိရသည်။

F-35 ဂျက်တိုက်လေယာဉ်သစ်များ သို့မဟုတ် Adir ( ဟီးဘရူးဘာသာဖြင့် စွမ်းအားရှင်)များကို အမေရိကန်နိုင်ငံတက္ကဆက်စ်ပြည်နယ်ရှိ လော့ဒ်ဟီးမာတင်(Lockheed Martin) လေယာဉ်ကုမ္ပဏီမှ ထုတ်လုပ်ခဲ့ခြင်းဖြစ်သည်။

“ အစ္စရေးလေတပ်ရဲ့ မဟာဗျူဟာမြောက်စွမ်းဆောင်ရည် နဲ့ စစ်ဆင်ရေးအတွက် နောက်ထပ် အလွှာတစ်ခုကို ဖြည့်ဆည်းပေးလိုက်တာပဲ” ဟု အစ္စရေးစစ်တပ်၏ ထုတ်ပြန်ချက်တစ်စောင်တွင် ဖော်ပြထားသည်။

အစ္စရေးနိုင်ငံသည် အမေရိကန်ထံမှ F-35 ဂျက်တိုက်လေယာဉ် အစင်း ၅ဝ လက်ခံရရှိရန် ရှိနေပြီး ယခုရောက်ရှိလာသော လေယာဉ်သစ် ၂ စင်းမှာ ယင်း၏အစိတ်အပိုင်းတစ်ရပ်ဖြစ်ကြောင်း ၊ ပထမအသုတ်လေယာဉ်များသည် ၂ဝ၁၆ ခုနှစ် ဒီဇင်ဘာတွင် အစ္စရေးနိုင်ငံသို့ရောက်ရှိလာခဲ့ကြောင်း နှင့် ၂ဝ၁၉ ခုနှစ် နှစ်ကုန်ပိုင်းတွင် အစ္စရေးသည် F-35 ဂျက်တိုက်လေယာဉ် အစင်း ၂ဝ ထိ ပိုင်ဆိုင်တော့မည်ဖြစ်ကြောင်း သိရသည်။

“ စွမ်းဆောင်ရည်မြင့် F-35 ဂျက်တိုက်လေယာဉ်တွေကို လက်ခံရရှိခြင်းဟာ အမေရိကန် နဲ့အစ္စရေး အကြား ကာလရှည်ကြာစွာ တည်ရှိခဲ့တဲ့ စစ်ဘက်ဆိုင်ရာပူးပေါင်းဆောင်ရွက်မှုရဲ့ နောက်ထပ်ပြယုဂ်တစ်ခုပါပဲ ” ဟု ထုတ်ပြန်ချက်တွင် ဖော်ပြထားသည်။ အစ္စရေးလေတပ်သည် အမေရိကန်နိုင်ငံပြင်ပ၌ F-35 ဂျက်တိုက်လေယာဉ်များ စစ်ရေးတာဝန်ထမ်းဆောင်နေသည့် ကမ္ဘာ့ပထမဆုံးလေတပ်ဖြစ်ကြောင်း ထုတ်ပြန်ချက်တွင် ဆက်လက်ဖော်ပြထားသည်။

ပြီးခဲ့သော ဇွန်လက အမေရိကန်နိုင်ငံ၏ ဦးဆောင်မှုဖြင့် ဗြိတိသျှလေတပ် နှင့် အစ္စရေး လေတပ်တို့ပါဝင်သော “ Tri-Lightning” သုံးနိုင်ငံ ပူးတွဲစစ်ရေးလေ့ကျင့်မှုတွင် F-35 တိုက်လေယာဉ်များပါဝင် ဆောင်ရွက်ခဲ့ကြောင်း သိရသည်။

F-35 သည် အမေရိကန်နိုင်ငံ၏ အသစ်လွင်ဆုံးနှင့်နည်းပညာအမြင့်ဆုံး ဂျက်တိုက်လေယာဉ်မျိုးဆက်ဖြစ်သည်။ ၎င်းသည် သမာရိုးကျရေဒါစနစ်ကို ရှောင်လွှဲနိုင်ရန် အထူးထုတ်လုပ်ထားပြီး ကိုယ်ပျောက်လေယာဉ်အမျိုးအစားဖြစ်သည်။ထို့ပြင် ၎င်းသည် ဗုံးတွဲများကိုလည်း သယ်ဆောင်နိုင်ပြီး အလွန်လျင်မြန်သောအရှိန် Mach 1.6 (တစ်နာရီ ၁၂၃ဝ မိုင်) ထိ ပျံသန်းနိုင်စွမ်းရှိသည်။

သို့သော်လည်း ယင်းဂျက်တိုက်လေယာဉ်မှာ ကုန်ကျစာရိတ်ကြီးမြင့်မှု နှင့် အင်ဂျင်ပိုင်းဆိုင်ရာ အားနည်းမှု တို့ကြောင့် အမေရိကန်ကွန်ဂရက်၏ ဝေဖန်ထောက်ပြခြင်းခံနေရသည်။(Xinhua)