ဆီးရီးယား အရှေ့ပိုင်းတွင် အမေရိကန်ဦးဆောင်သော IS ဆန့်ကျင်ရေး မဟာမိတ်တပ်က ဖော့စဖောရက်ဗုံးများဖြင့် တိုက်ခိုက်

ဒမတ်စကပ်စ်၊ မတ် ၄ ရက် (ဆင်ဟွာ)

ဆီးရီးယားနိုင်ငံ အရှေ့ပိုင်းရှိ IS စစ်သွေးကြွများ ထိန်းချုပ်ထားသော ဧရိယာတစ်ခုကို အမေရိကန်ဦးဆောင်သော မဟာမိတ်တပ်ဖွဲ့က မတ် ၃ ရက်တွင် အဆိပ်သင့် အဖြူရောင်ဖော့စဖောရက်ဗုံးများ ဖြင့် တိုက်ခိုက်ခဲ့ပြီး အမျိုးသမီးများ နှင့် ကလေးငယ်များ သေဆုံးခဲ့ကြောင်း SANA သတင်းဌာနက ဖော်ပြခဲ့သည်။

အဆိုပါ တိုက်ခိုက်မှုသည် Deir al-Zour ပြည်နယ် အရှေ့ပိုင်း Euphrates River ဒေသ အရှေ့ဘက်ရှိ IS တို့နောက်ဆုံးထိန်းချုပ်ထားသော Baghouz မြို့ ၏ စိုက်ခင်းများကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း SANA ကဖော်ပြခဲ့သည်။

Baghouz မြို့မှ ပြည်သူ ထောင်ပေါင်းများစွာကို ရွှေ့ပြောင်းထွက်ခွာသွားပြီးနောက် ယင်းမြို့ရှိ IS စစ်သွေးကြွလက်ကျန်များကို အမေရိကန်ကကျောထောက်နောက်ခံပေးထားသော ဆီးရီးယားဒီမိုကရက်တစ်တပ်ဖွဲ့(SDF) က နောက်ဆုံးထိုးစစ်ဆင်မှုများပြုလုပ်နေစဉ် ယင်းတိုက်ခိုက်မှုထွက်ပေါ်လာခြင်းဖြစ်သည်။

အမေရိကန်ဦးဆောင်သော မဟာမိတ်တပ်ဖွဲ့သည် IS စစ်သွေးကြွများအား နောက်ဆုံးထိုးစစ်စင်မှုများပြုလုပ်နေသည့် SDF တပ်ဖွဲ့အား ၂၀၁၈ခုနှစ် စက်တင်ဘာလကတည်းက ကူညီထောက်ပံ့ပေးခဲ့ကြောင်း သိရသည်။

ဆီးရီးယားအစိုးရသည် အမေရိကန်ဦးဆောင်သော မဟာမိတ်တပ်ဖွဲ့အနေဖြင့် IS စစ်သွေးကြွများအား တိုက်ခိုက်ရာတွင် အရပ်သားများအား ပစ်မှတ်ထားတိုက်ခိုက်နေကြောင်း အကြိမ်ပေါင်းများစွာ စွပ်စွဲပြစ်တင်ခဲ့ပြီး ယင်းမဟာမိတ် တပ်ဖွဲ့ပြဿနာအားဖြေရှင်းရန် နိုင်ငံတကာအသိုင်းအဝိုင်းအား အကူအညီတောင်းခံထားကြောင်း သိရသည်။ (Xinhua)