Politics, Law & Military
ရှမ်းပြည်နယ်၊ မိုးနဲမြို့၌ ကျပ် ၂,၇၁၂ သိန်း တန်ဖိုးရှိ ဘိန်းမဲများ ဖမ်းဆီးရမိ
ရန်ကုန် ၊ ဇန်နဝါရီ ၅ ရက်(ဆင်ဟွာ)
ရှမ်းပြည်နယ်၊ မိုးနဲမြို့၊ နားခံကျေးရွာအနီး မိုးနဲ-နမ့်စန်သွား ကားလမ်းပေါ်တွင် ယာဉ်တစ်စီးပေါ်မှ ငွေကျပ် ၂၇၁၂ သိန်း တန်ဖိုးရှိ ဘိန်းမဲများအား ဖမ်းဆီး ရမိခဲ့ကြောင်း မူးယစ်ဆေးဝါး တားဆီး နှိမ်နင်းရေး ဗဟိုကော်မတီမှ ထုတ်ပြန်သော သတင်း အရ သိရသည်။
မိုးနဲ-နမ့်စန်သွား ကားလမ်းပေါ်တွင် ဇန်နဝါရီ ၃ ရက်တွင် မိုးနဲတပ်နယ်မှ တပ်မတော်သားများသည် ကျိုင်းတောင်းဘက်မှ မောင်းနှင်လာသည့် မော်တော်ယာဉ်အား ရပ်တန့်စစ်ဆေးစဉ် ယာဉ်မှာ ရပ်တန့်မှုမရှိဘဲ မောင်းနှင်ထွက်ပြေးသဖြင့် လိုက်လံဖမ်းဆီးရာ ယာဉ်ပေါ်မှ လူ ၃ ဦးဆင်းပြေးသွားပြီး အဆိုပါယာဉ်အား ရှာဖွေစစ်ဆေးရာ ယာဉ်ပေါ်တွင် ပီနံအိတ်များအတွင်းမှ ပလတ်စတစ်ဘူးဝိုင်းများဖြင့် ထည့်လျက် စုစုပေါင်း ဘိန်းမဲအလေးချိန် ၄၅၂ ကီလို (ဒေသ ကာလ ပေါက်ဈေး တန်ဖိုး ငွေကျပ် ၂၇၁၂ သိန်း) အား တွေ့ရှိသိမ်းဆည်းရမိခဲ့ကြောင်း သိရသည်။ထို့ကြောင့် မိုးနဲမြို့မရဲစခန်းတွင် မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါး များဆိုင်ရာဥပဒေဖြင့် အမှုဖွင့် အရေးယူပြီး တရားခံဖမ်းဆီးရမိရေး စုံစမ်းဆောင်ရွက်လျက်ရှိကြောင်း သိရသည်။(Xinhua)
