ကဘူးလ် အသေခံ ဗုံးဖောက်ခွဲမှု လူ ၄ ဦး သေဆုံး၊ ၁၁ ဦး ဒဏ်ရာရ

ကဘူးလ်၊ နိုဝင်ဘာ ၁၆ ရက် (ဆင်ဟွာ)

အာဖဂန်နစ္စတန်နိုင်ငံ မြို့တော် ကဘူးလ်၌ နိုဝင်ဘာလ ၁၆ ရက် နံနက်ပိုင်းက ဖြစ်ပွားခဲ့သည့် အသေခံ ဗုံးဖောက်ခွဲမှုကြောင့် သေဆုံးသူ ၄ ဦးအထိ ရှိလာပြီး ဒဏ်ရာရရှိသူ ၁၁ ဦးရှိကြောင်း သိရသည်။

နိုဝင်ဘာလ ၁၆ ရက် ဒေသစံတော်ချိန် နံနက် ၈း၀၀ နာရီဝန်းကျင်က အသေခံ ဗုံးဖောက်ခွဲသူ တစ်ဦးသည် ကာကွယ်ရေး ဝန်ကြီးဋ္ဌာနအနီး Pul-e-Mahmoud Khan နယ်မြေရှိ ယာဉ် တစ်စင်း နံဘေး၌ ဗုံးဖောက်ခွဲခဲ့ခြင်း ဖြစ်ကြောင်း ပြည်ထဲရေး ဝန်ကြီးဋ္ဌာန ပြောရေးဆိုခွင့်ရှိသူ Sediq Sediqi က ပြောသည်။

စုံစမ်းစစ်ဆေးရေး လုပ်ငန်းများ လုပ်ဆောင်နေဆဲ ဖြစ်ကြောင်းကိုသာ ပြောကြားခဲ့ပြီး အသေးစိတ် အကြောင်းအရာများအား ၎င်းက ပြောကြားထားခြင်း မရှိပေ။

ပြည်ထဲရေး ဝန်ကြီးဋ္ဌာနမှ ကြေညာချက် ထုတ်ပြန်ထားခြင်း မရှိသေးသော်လည်း အခင်းဖြစ်ပွားရာ နေရာ၌ ရှိနေသည့် အမည်မဖော်လိုသူ အရာရှိ တစ်ဦးကမူ နိုင်ငံ၏ သူလျှို အေဂျင်စီ တစ်ခုဖြစ်သည့် အမျိုးသား လုံခြုံရေး ဦးစီးဋ္ဌာန (NDS) ၏ အဖွဲ့ဝင်များ လိုက်ပါလာသည့် မီနီဘတ်စ်ကား တစ်စီးအား ဦးတည် တိုက်ခိုက်ခြင်း ဖြစ်ကြောင်း ပြောကြားခဲ့သည်။

အဆိုပါ ဗုံးဖောက်ခွဲမှုနှင့် ပတ်သက်၍ မည်သည့်အဖွဲ့ လက်ချက်ဖြစ်ကြောင်း ပြောကြားထားခြင်း မရှိသေးပေ။ အခင်း ဖြစ်ပွားသည့်နေရာအား ရဲတပ်ဖွဲ့က ပိတ်ထားသလို သတင်းထောက်များကိုလည်း သတင်း ဝင်ရောက်ယူခွင့် ပိတ်ပင်ထားကြောင်း သိရသည်။ (Xinhua)