မက္ကဆီကိုနိုင်ငံတွင် ၂၀၁၉ ခုနှစ် ဟာရီကိန်းရာသီ၌ ဆိုင်ကလုန်းမုန်တိုင်း ၃၃ လုံးဝင်ရောက်မည်ဟု ခန့်မှန်း

မက္ကဆီကိုစီးတီး၊ မေ ၁၆ ရက် (ဆင်ဟွာ)

မက္ကဆီကိုနိုင်ငံတွင် ၂၀၁၉ ခုနှစ်အတွင်း ကမ်းရိုးတန်းသို့ ဆိုင်ကလုန်းမုန်တိုင်း ၃၃ လုံးဝင်ရောက်မည်ဟု National Water Commission (Conagua) က မေလ ၁၅ ရက်တွင် သတင်းတင်ပြခဲ့သည်။

ခန့်မှန်းထားသည့် ဆိုင်ကလုန်းမုန်တိုင်း ၃၃ လုံးအနက် ဟာရီကိန်းမုန်တိုင်း ၁၉ လုံးနှင့် အပူပိုင်းမုန်တိုင်း ၁၃ လုံးဖြစ်လာနိုင်မည်ဟု မျှော်လင့်ရကြောင်း ၂၀၁၉ ခုနှစ် မိုးရွာခြင်းနှင့် အပူပိုင်းဆိုင်ကလုန်းမုန်တိုင်းများ ကာကွယ်ရေးဆိုင်ရာ အမျိုးသားအဆင့် အစည်းအဝေး၌ National Water Commission (Conagua) က ကြေညာခဲ့သည်။

အဆိုပါ ခန့်မှန်းချက်များ၌ ပစိတ်ဖိတ်သမုဒ္ဒရာတွင် ဖြစ်ပေါ်နေသော အန္တရာယ်ရှိဆိုင်ကလုန်းမုန်တိုင်း ၁၉ လုံးနှင့် အတ္တလန်တိတ်သမုဒ္ဒရာတွင် ဖြစ်ပေါ်သော မုန်တိုင်း ၁၄ လုံးတို့ ပါဝင်ကြောင်း Conagua အထွေထွေညွှန်ကြားရေးမှူး ဘလန်ကာ ဂျင်မီနက်ဇ် (Blanca Jimenez) က ရှင်းပြခဲ့သည်။

အတ္တလန်တိတ်သမုဒ္ဒရာတွင် ဖြစ်ပေါ်နေသော ဆိုင်ကလုန်းမုန်တိုင်း ၁၄ လုံး၌ အပူပိုင်းမုန်တိုင်း ၆ လုံးနှင့် ဟာရီကိန်းမုန်တိုင်း ၈ လုံးဖြစ်လာမည်ဟု Conagua က ခန့်မှန်းထားကြောင်း အရာရှိက ဖြည့်စွက်ပြောခဲ့သည်။

“အဲဒီဆိုင်ကလုန်းမုန်တိုင်း လေးလုံးကနေ ခြောက်လုံးက ကျွန်တော်တို့နိုင်ငံကို ဝင်ဖို့အလားအလာ အလွန်များပါတယ်” ဟု စစ်တပ်နှင့် မက္ကဆီကိုလုံခြုံရေးအေဂျင်စီ တာဝန်ရှိသူများနှင့် မတွေ့ဆုံမီ ပြောကြားခဲ့ပြီး အဆိုပါ အေဂျင်စီက ဆိုင်ကလုန်းရာသီအတွက် အရန်သင့်အစီအစဉ်တစ်ခု ထားရှိကြောင်းလည်း ဂျင်မီနက်ဇ်က ဖြည့်စွက်ပြောကြားခဲ့သည်။

၎င်း၏အဆိုအရ ၂၀၁၈ ခုနှစ် ဆိုင်ကလုန်းရာသီအတွင်း အဆင့် ၃ သို့မဟုတ် ပို၍ မြင့်သော ဟာရီကိန်း ၁၁ လုံး အပါအဝင် အန္တရာယ်ရှိသော မုန်တိုင်း ၃၇ လုံး ဝင်ရောက်ခဲ့ကြောင်း မှတ်တမ်းဝင်ခဲ့သည်။ (Xinhua)